ಮಂಗಳೂರು , ಸೆಪ್ಟೆಂಬರ್ 05: ಕರಾವಳಿ ಮತ್ತು ರಾಜಧಾನಿ ಬೆಂಗಳೂರು ನಡುವಿನ ಬಹುನಿರೀಕ್ಷಿತ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಸಂಚಾರಕ್ಕೆ ಮತ್ತೊಂದು ಮಹತ್ವದ ಹೆಜ್ಜೆ ಇಡಲಾಗಿದೆ. ಸಕಲೇಶಪುರ-ಸುಬ್ರಹ್ಮಣ್ಯ ರೋಡ್ ಘಾಟ್‌ ವಿಭಾಗದಲ್ಲಿ ಯಶಸ್ವಿಯಾಗಿ ಪ್ರಾಯೋಗಿಕ ಸಂಚಾರ ನಡೆಸಿರುವ ರೈಲನ್ನು ಇಂದು ಯಶವಂತಪುರದಿಂದ ಮಂಗಳೂರು ಸೆಂಟ್ರಲ್‌ವರೆಗೆ ಸಂಪೂರ್ಣ ಮಾರ್ಗದಲ್ಲಿ ಪ್ರಾಯೋಗಿಕವಾಗಿ ಓಡಿಸಲು ನೈರುತ್ಯ ರೈಲ್ವೆ ನಿರ್ಧರಿಸಿದೆ. ಈ ವಿಚಾರವನ್ನು ಮಂಗಳೂರು ಸಂಸದ ಬ್ರಿಜೇಶ್ ಚೌಟ ದೃಢೀಕರಿಸಿದ್ದಾರೆ.

20 ಬೋಗಿಗಳ ಬಳಿಕ ಈಗ 16 ಬೋಗಿಗಳ ರೇಕ್‌ನಲ್ಲಿ ಪರೀಕ್ಷೆ
ಈಗಾಗಲೇ ಆಗಸ್ಟ್ 12ರಿಂದ 20ರವರೆಗೆ ಸಕಲೇಶಪುರ-ಸುಬ್ರಹ್ಮಣ್ಯ ರೋಡ್ ನಡುವಿನ ಕಡಿದಾದ ಘಾಟ್‌ ಸೆಕ್ಷನ್‌ನಲ್ಲಿ 20 ಬೋಗಿಗಳ ವಂದೇ ಭಾರತ್ ರೈಲಿನ ಪ್ರಾಯೋಗಿಕ ಸಂಚಾರ ನಡೆಸಲಾಗಿತ್ತು. ಇದರ ಮುಂದುವರಿದ ಭಾಗವಾಗಿ ಇದೀಗ 16 ಬೋಗಿಗಳ ರೇಕ್‌ನೊಂದಿಗೆ ಯಶವಂತಪುರದಿಂದ ಮಂಗಳೂರು ಸೆಂಟ್ರಲ್‌ವರೆಗೆ ಸಂಪೂರ್ಣ ಮಾರ್ಗದಲ್ಲಿ ಪ್ರಾಯೋಗಿಕ ಸಂಚಾರ ನಡೆಸಲಾಗುತ್ತಿದೆ. ಇದರಿಂದ ಬೆಂಗಳೂರು-ಮಂಗಳೂರು ನಡುವೆ ರೈಲಿನ ಸಂಚಾರ ಸಾಮರ್ಥ್ಯ ಹಾಗೂ ಪ್ರಯಾಣದ ಅವಧಿಯ ಕುರಿತು ಮತ್ತಷ್ಟು ಸ್ಪಷ್ಟತೆ ದೊರೆಯಲಿದೆ.

ಸೆ.5ರ ಅಂದಾಜು ವೇಳಾಪಟ್ಟಿ ಹೀಗಿದೆ
ಪ್ರಾಯೋಗಿಕ ಸಂಚಾರದ ವೇಳೆ ರೈಲು ಈ ಕೆಳಗಿನ ಸಮಯದಲ್ಲಿ ಪ್ರಮುಖ ನಿಲ್ದಾಣಗಳನ್ನು ತಲುಪುವ ಅಂದಾಜಿದೆ:

• ಯಶವಂತಪುರದಿಂದ ನಿರ್ಗಮನ: ಬೆಳಗ್ಗೆ 6.05
• ಹಾಸನ: ಬೆಳಗ್ಗೆ 9.00
• ಸಕಲೇಶಪುರ: ಬೆಳಗ್ಗೆ 9.55
• ಸುಬ್ರಹ್ಮಣ್ಯ ರೋಡ್: ಮಧ್ಯಾಹ್ನ 12.30
• ಮಂಗಳೂರು ಸೆಂಟ್ರಲ್ ಆಗಮನ: ಮಧ್ಯಾಹ್ನ 2.25
• ಮಂಗಳೂರು ಸೆಂಟ್ರಲ್‌ನಿಂದ ಮರು ನಿರ್ಗಮನ: ಮಧ್ಯಾಹ್ನ 3.00
• ಯಶವಂತಪುರ ತಲುಪುವ ನಿರೀಕ್ಷೆ: ರಾತ್ರಿ 11.00

ಈ ವೇಳಾಪಟ್ಟಿಯ ಪ್ರಕಾರ ಯಶವಂತಪುರದಿಂದ ಮಂಗಳೂರು ಸೆಂಟ್ರಲ್‌ವರೆಗೆ ಪ್ರಯಾಣಕ್ಕೆ ಅಂದಾಜು 8 ಗಂಟೆ 20 ನಿಮಿಷಗಳ ಕಾಲಾವಕಾಶ ಬೇಕಾಗಬಹುದು ಎಂದು ಲೆಕ್ಕಾಚಾರ ಹಾಕಲಾಗಿದೆ.

ಘಾಟ್‌ನಲ್ಲಿ ಎಷ್ಟು ವೇಗ? ತಾಂತ್ರಿಕ ತಂಡದ ಕಣ್ಣಿಟ್ಟ ಅಧ್ಯಯನ

ಪ್ರಾಯೋಗಿಕ ಸಂಚಾರದ ಪ್ರಮುಖ ಉದ್ದೇಶಗಳಲ್ಲಿ ಘಾಟ್‌ ವಿಭಾಗದ ರೈಲು ವೇಗ ಹಾಗೂ ಪ್ರಯಾಣದ ಸಮಯದ ಅಧ್ಯಯನವೂ ಸೇರಿದೆ. ಸುರಕ್ಷತಾ ಕ್ರಮಗಳಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳದೆ, ಸಾಧ್ಯವಾದಷ್ಟು ಪ್ರಯಾಣದ ಸಮಯವನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ರೈಲ್ವೆ ಮಂಡಳಿ ಅಧಿಕಾರಿಗಳಿಗೆ ಸೂಚನೆ ನೀಡಿದೆ.

ವಿಶೇಷವಾಗಿ ಸಕಲೇಶಪುರ-ಸುಬ್ರಹ್ಮಣ್ಯ ರೋಡ್ ನಡುವಿನ ಕಡಿದಾದ ಘಾಟ್‌ ವಿಭಾಗದಲ್ಲಿ ವಂದೇ ಭಾರತ್ ರೈಲು ಯಾವ ವೇಗದಲ್ಲಿ ಸಂಚರಿಸಲಿದೆ, ತಿರುವುಗಳು ಹಾಗೂ ಇಳಿಜಾರುಗಳಲ್ಲಿ ರೈಲಿನ ಸಂಚಾರದ ಗುಣಮಟ್ಟ ಹೇಗಿರಲಿದೆ ಎಂಬುದನ್ನು ತಾಂತ್ರಿಕ ತಂಡ ಸೂಕ್ಷ್ಮವಾಗಿ ಪರಿಶೀಲಿಸಲಿದೆ. ಘಾಟ್‌ ಪ್ರದೇಶದ ಭೌಗೋಳಿಕ ಪರಿಸ್ಥಿತಿ, ರೈಲಿನ ಕಾರ್ಯಕ್ಷಮತೆ, ವೇಗ ನಿಯಂತ್ರಣ ಹಾಗೂ ಒಟ್ಟಾರೆ ಪ್ರಯಾಣದ ಅವಧಿಯನ್ನು ಪರಿಗಣಿಸಿ ಅಂತಿಮ ವರದಿ ಸಿದ್ಧಪಡಿಸಲಾಗುತ್ತದೆ.

ವರದಿ ಬಳಿಕ ವಾಣಿಜ್ಯ ಸಂಚಾರದ ದಿನಾಂಕ

ಸೆಪ್ಟೆಂಬರ್ 5ರ ಪ್ರಾಯೋಗಿಕ ಸಂಚಾರ ಪೂರ್ಣಗೊಂಡ ಬಳಿಕ ಅಧಿಕಾರಿಗಳು ರೈಲಿನ ಕಾರ್ಯಕ್ಷಮತೆ ಸೇರಿದಂತೆ ವಿವಿಧ ತಾಂತ್ರಿಕ ಅಂಶಗಳ ಕುರಿತು ಸಮಗ್ರ ವರದಿಯನ್ನು ರೈಲ್ವೆ ಮಂಡಳಿಗೆ ಸಲ್ಲಿಸಲಿದ್ದಾರೆ.

ಈ ವರದಿಯ ಆಧಾರದ ಮೇಲೆ ಮುಂದಿನ ನಿರ್ಧಾರ ಕೈಗೊಳ್ಳಲಾಗಲಿದ್ದು, ಎಲ್ಲವೂ ನಿರೀಕ್ಷೆಯಂತೆ ನಡೆದರೆ ಬೆಂಗಳೂರು-ಮಂಗಳೂರು ವಂದೇ ಭಾರತ್ ಎಕ್ಸ್‌ಪ್ರೆಸ್‌ನ ವಾಣಿಜ್ಯ ಸಂಚಾರ ಆರಂಭದ ಅಧಿಕೃತ ದಿನಾಂಕ ಪ್ರಕಟವಾಗುವ ನಿರೀಕ್ಷೆಯಿದೆ.

ಕರಾವಳಿ ಮತ್ತು ರಾಜಧಾನಿ ನಡುವಿನ ವೇಗದ ರೈಲು ಸಂಪರ್ಕಕ್ಕಾಗಿ ಬಹುಕಾಲದಿಂದ ಕಾಯುತ್ತಿರುವ ಪ್ರಯಾಣಿಕರಿಗೆ ಸೆಪ್ಟೆಂಬರ್ 5ರ ಈ ಪ್ರಾಯೋಗಿಕ ಸಂಚಾರ ಮತ್ತೊಂದು ಮಹತ್ವದ ಬೆಳವಣಿಗೆಯಾಗಿದೆ.