ಬೆಂಗಳೂರು, ಸೆ.11: ಇನ್‌ಸ್ಟಾಗ್ರಾಂ, ಫೇಸ್‌ಬುಕ್‌, ವಾಟ್ಸಾಪ್‌ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಇದೀಗ ಎಲ್ಲಿ ನೋಡಿದರೂ 80ರ ದಶಕದ ವಿಂಟೇಜ್ ಫೋಟೋಗಳು ಹಾಗೂ ರೆಟ್ರೋ ಲುಕ್‌ಗಳದ್ದೇ ಹವಾ!

AI ತಂತ್ರಜ್ಞಾನ ಬಳಸಿ ಸಾಮಾನ್ಯ ಫೋಟೋಗಳನ್ನು ಹಳೆಯ ಕ್ಯಾಮೆರಾ ಫಿಲ್ಮ್‌ನಲ್ಲಿ ತೆಗೆದಂತೆ, ಬೆಲ್‌ಬಾಟಮ್ ಪ್ಯಾಂಟ್‌, ವಿಂಟೇಜ್ ಕಾಸ್ಟ್ಯೂಮ್‌, ಕ್ಲಾಸಿಕ್ ಬ್ಯಾಕ್‌ಗ್ರೌಂಡ್‌ ಹಾಗೂ 80s ಪೋಸ್ಟರ್‌ ಲುಕ್‌ನಲ್ಲಿ ಪರಿವರ್ತಿಸುವ ಕ್ರೇಜ್ ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚಾಗಿದೆ.

ಆದರೆ, ಟ್ರೆಂಡ್‌ಗಾಗಿ AI ಆ್ಯಪ್‌ಗಳಿಗೆ ನಿಮ್ಮ ಫೋಟೋಗಳನ್ನು ಅಪ್‌ಲೋಡ್ ಮಾಡುವ ಮುನ್ನ ಒಮ್ಮೆ ಯೋಚಿಸಬೇಕಿದೆ. ನಿಮ್ಮ ಫೋಟೋ ಹಾಗೂ ಅದಕ್ಕೆ ಸಂಬಂಧಿಸಿದ ವೈಯಕ್ತಿಕ ಡೇಟಾ ಸೈಬರ್ ಅಪರಾಧಿಗಳ ಕೈಗೆ ಸಿಲುಕುವ ಸಾಧ್ಯತೆ ಇದೆ ಎಂದು ಸೈಬರ್ ತಜ್ಞರು ಎಚ್ಚರಿಸಿದ್ದಾರೆ.

80s ಫೋಟೋ ವೈಬ್‌ ಎಷ್ಟು ಅಪಾಯಕಾರಿ?

ಸಾಮಾಜಿಕ ಜಾಲತಾಣಗಳಲ್ಲಿ ಹೊಸ ಹೊಸ ಟ್ರೆಂಡ್‌ಗಳು ವೈರಲ್ ಆಗುವುದು ಸಾಮಾನ್ಯ. ಇದೀಗ 1980ರ ದಶಕದ ಫೋಟೋ ಲುಕ್‌ ಸೃಷ್ಟಿಸುವ ಟ್ರೆಂಡ್‌ ಕೂಡ ಇದೇ ರೀತಿ ವೇಗವಾಗಿ ಹರಡುತ್ತಿದೆ. AI ಆ್ಯಪ್‌ಗಳಲ್ಲಿ ತಮ್ಮ ಮೂಲ ಫೋಟೋಗಳನ್ನು ಅಪ್‌ಲೋಡ್ ಮಾಡಿ ಕೆಲವೇ ಕ್ಷಣಗಳಲ್ಲಿ ರೆಟ್ರೋ ಲುಕ್‌ ಪಡೆಯುತ್ತಿದ್ದಾರೆ. ಆದರೆ, ಈ ಪ್ರಕ್ರಿಯೆಯಲ್ಲಿ ಬಳಕೆದಾರರು ತಮ್ಮ ಮೂಲ ಫೋಟೋಗಳನ್ನು ಮೂರನೇ ವ್ಯಕ್ತಿಯ ಆ್ಯಪ್‌ಗಳಿಗೆ ಹಂಚಿಕೊಳ್ಳುತ್ತಿದ್ದಾರೆ ಎಂಬುದನ್ನು ಮರೆಯಬಾರದು.

ಸೈಬರ್ ತಜ್ಞರಿಂದ ಎಚ್ಚರಿಕೆ

ರಾಜ್ಯದಲ್ಲಿ ವೈರಲ್ ಆಗಿರುವ 80s ಫೋಟೋ ಟ್ರೆಂಡ್‌ ಕುರಿತು ಸೈಬರ್ ತಜ್ಞೆ ಡಾ. ಶುಭಮಂಗಳ ಎಚ್ಚರಿಕೆ ನೀಡಿದ್ದಾರೆ. AI ಮೂಲಕ ವಿಂಟೇಜ್ ಫೋಟೋ ಅಥವಾ ಪೋಸ್ಟರ್‌ಗಳನ್ನು ಸೃಷ್ಟಿಸುವ ಉತ್ಸಾಹದಲ್ಲಿ ತಮ್ಮ ಮೂಲ ಫೋಟೋಗಳನ್ನು ಅಪರಿಚಿತ ಆ್ಯಪ್‌ಗಳಿಗೆ ನೀಡಬಾರದು. ಹೀಗೆ ಮಾಡುವ ಮೂಲಕ ಸೈಬರ್ ಅಪರಾಧಿಗಳಿಗೆ ತಮ್ಮ ಫೋಟೋಗಳನ್ನು ದುರುಪಯೋಗಪಡಿಸಿಕೊಳ್ಳಲು ಅವಕಾಶ ನೀಡಬಾರದು ಎಂದು ಅವರು ಎಚ್ಚರಿಸಿದ್ದಾರೆ.

ಸೈಬರ್ ಕಿರಾತಕರಿಗೆ ಇದೇ ಬಂಡವಾಳ !

80s ಲುಕ್‌ನಲ್ಲಿ ಫೋಟೋ ಸೃಷ್ಟಿಸುವ ಬಳಕೆದಾರರ ಆಸಕ್ತಿಯೇ ಸೈಬರ್ ಅಪರಾಧಿಗಳಿಗೆ ಬಂಡವಾಳವಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ವಿಶೇಷವಾಗಿ ಯುವತಿಯರು ತಮ್ಮ ವೈಯಕ್ತಿಕ ಫೋಟೋಗಳನ್ನು AI ಆ್ಯಪ್‌ಗಳಿಗೆ ಅಪ್‌ಲೋಡ್ ಮಾಡುವಾಗ ಹೆಚ್ಚಿನ ಎಚ್ಚರಿಕೆ ವಹಿಸಬೇಕು ಎಂದು ಸಲಹೆ ನೀಡಿದ್ದಾರೆ.

ಫೇಸ್‌ ಡೇಟಾ ದುರುಪಯೋಗದ ಅಪಾಯ; 

AI ಆ್ಯಪ್‌ಗೆ ಅಪ್‌ಲೋಡ್ ಮಾಡುವ ಮೂಲ ಫೋಟೋಗಳು ಸೈಬರ್ ಅಪರಾಧಿಗಳ ಕೈಗೆ ಸಿಕ್ಕರೆ, ಅವುಗಳನ್ನು ವಿವಿಧ ರೀತಿಯಲ್ಲಿ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆ ಇದೆ. ಮುಖದ ಮಾಹಿತಿಯನ್ನು ಒಳಗೊಂಡಿರುವ ಫೋಟೋಗಳ ಮೂಲಕ Face Data Exposure ಉಂಟಾಗಬಹುದು. ಮುಖ ಗುರುತಿಸುವಿಕೆ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಮಾಹಿತಿಯ ದುರುಪಯೋಗದಿಂದ ವೈಯಕ್ತಿಕ ಗೌಪ್ಯತೆಗೆ ಧಕ್ಕೆಯಾಗುವ ಅಪಾಯವೂ ಇದೆ.

ಡೀಪ್‌ಫೇಕ್‌ಗೂ ಬಳಕೆಯಾಗಬಹುದು!

ಸೈಬರ್ ತಜ್ಞರ ಪ್ರಕಾರ, ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುವ ಅಥವಾ AI ಆ್ಯಪ್‌ಗಳಿಗೆ ಅಪ್‌ಲೋಡ್ ಮಾಡುವ ಫೋಟೋಗಳು ಮುಂದೆ ಡೀಪ್‌ಫೇಕ್‌, ನಗ್ನ ಚಿತ್ರ ಸೇರಿದಂತೆ ವಿವಿಧ ರೀತಿಯ ನಕಲಿ ಡಿಜಿಟಲ್ ಕಂಟೆಂಟ್‌ ಸೃಷ್ಟಿಗೆ ದುರುಪಯೋಗವಾಗುವ ಸಾಧ್ಯತೆಯಿದೆ. ಅಪರಿಚಿತ ಮೂಲದ ಆ್ಯಪ್‌ಗಳಲ್ಲಿ ಫೋಟೋ ಅಪ್‌ಲೋಡ್ ಮಾಡುವುದರಿಂದ ವೈಯಕ್ತಿಕ ಮಾಹಿತಿಯ ಗೌಪ್ಯತೆ ಮತ್ತು ಡೇಟಾ ಸುರಕ್ಷತೆಯ ಬಗ್ಗೆ ಪ್ರಶ್ನೆಗಳು ಎದುರಾಗಬಹುದು.

ಅಲ್ಲದೆ, ಕದ್ದ ಅಥವಾ ದುರುಪಯೋಗಪಡಿಸಿಕೊಂಡ ಫೋಟೋಗಳು ಆನ್‌ಲೈನ್‌ನ ವಿವಿಧ ಅಕ್ರಮ ಜಾಲಗಳಿಗೆ ತಲುಪುವ ಅಪಾಯವನ್ನೂ ಸಂಪೂರ್ಣವಾಗಿ ನಿರ್ಲಕ್ಷಿಸಲಾಗದು.

ಟ್ರೆಂಡ್‌ಗಾಗಿ ಸುರಕ್ಷತೆಯನ್ನು ಮರೆಯಬೇಡಿ !

ಕಳೆದ ಕೆಲ ದಿನಗಳಿಂದ 80s ಫೋಟೋ ಟ್ರೆಂಡ್‌ ಭಾರಿ ವೈರಲ್ ಆಗಿರುವ ಹಿನ್ನೆಲೆಯಲ್ಲಿ, ಕೇವಲ ಟ್ರೆಂಡ್‌ಗಾಗಿ ಯಾವುದೇ ಅಪರಿಚಿತ AI ಆ್ಯಪ್‌ಗೆ ವೈಯಕ್ತಿಕ ಫೋಟೋಗಳನ್ನು ಅಪ್‌ಲೋಡ್ ಮಾಡದಂತೆ ಸೈಬರ್ ತಜ್ಞರು ಸಲಹೆ ನೀಡಿದ್ದಾರೆ. AI ಆ್ಯಪ್‌ ಬಳಸುವ ಮುನ್ನ ಅದರ ಗೌಪ್ಯತಾ ನೀತಿ, ಫೋಟೋಗಳನ್ನು ಹೇಗೆ ಸಂಗ್ರಹಿಸಲಾಗುತ್ತದೆ, ಎಷ್ಟು ಕಾಲ ಉಳಿಸಲಾಗುತ್ತದೆ ಹಾಗೂ ಮೂರನೇ ವ್ಯಕ್ತಿಗಳೊಂದಿಗೆ ಹಂಚಿಕೊಳ್ಳಲಾಗುತ್ತದೆಯೇ ಎಂಬುದನ್ನು ಪರಿಶೀಲಿಸುವುದು ಅಗತ್ಯ.

80s ಲುಕ್‌ ಪಡೆಯುವ ಮೊದಲು ಒಂದು ಕ್ಷಣ ಯೋಚಿಸಿ: ಟ್ರೆಂಡ್‌ ಬದಲಾಗುತ್ತದೆ, ಆದರೆ ನಿಮ್ಮ ಮುಖದ ಡೇಟಾ ಒಮ್ಮೆ ಸೋರಿಕೆಯಾದರೆ ಅದರ ನಿಯಂತ್ರಣ ಮರಳಿ ಪಡೆಯುವುದು ಕಷ್ಟ.