ಲಕ್ನೋ, ಮೇ 16: ಉತ್ತರ ಪ್ರದೇಶದಾದ್ಯಂತ ಬೀಸಿದ ಭೀಕರ ಗುಡುಗು-ಮಿಂಚಿನ ಬಿರುಗಾಳಿ ಭಾರೀ ಅನಾಹುತ ಸೃಷ್ಟಿಸಿದ್ದು, ಒಟ್ಟು 117 ಮಂದಿ ಸಾವನ್ನಪ್ಪಿದ್ದಾರೆ. ರಾಜ್ಯದ ಹಲವೆಡೆ ಮರಗಳು ಉರುಳಿ, ಮನೆಗಳು ಕುಸಿದು ಹಾಗೂ ವಿದ್ಯುತ್ ಕಂಬಗಳು ನೆಲಕ್ಕುರುಳಿದ ಪರಿಣಾಮ ಜನಜೀವನ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ.

ರಾಜ್ಯದ ಪರಿಹಾರ ಆಯುಕ್ತರ ಕಚೇರಿ ಬಿಡುಗಡೆ ಮಾಡಿದ ಅಂಕಿಅಂಶಗಳ ಪ್ರಕಾರ, ಭಾರೀ ಗಾಳಿ ಮತ್ತು ಕಟ್ಟಡ ಕುಸಿತದಿಂದ 113 ಮಂದಿ ಮೃತಪಟ್ಟಿದ್ದು, ಮಿಂಚು ಬಡಿದು ನಾಲ್ವರು ಪ್ರಾಣ ಕಳೆದುಕೊಂಡಿದ್ದಾರೆ. ಬುಧವಾರ ಮಧ್ಯಾಹ್ನ ಆರಂಭವಾದ ಈ ಪ್ರಕೃತಿ ವಿಕೋಪದಲ್ಲಿ 79 ಮಂದಿ ಗಾಯಗೊಂಡಿದ್ದು, 177 ಪ್ರಾಣಿಗಳು ಸಾವನ್ನಪ್ಪಿವೆ. ಜೊತೆಗೆ ವಿವಿಧ ಜಿಲ್ಲೆಗಳಲ್ಲಿ 330ಕ್ಕೂ ಹೆಚ್ಚು ಮನೆಗಳಿಗೆ ಹಾನಿಯಾಗಿದೆ.

ಅತಿ ಹೆಚ್ಚು ಹಾನಿಗೊಳಗಾದ ಜಿಲ್ಲೆ ಪ್ರಯಾಗ್‌ರಾಜ್ ಆಗಿದ್ದು, ಮರಗಳು ಉರುಳಿ, ಗೋಡೆಗಳು ಕುಸಿದು ಹಾಗೂ ಮನೆಗಳು ಜಖಂಗೊಂಡ ಪರಿಣಾಮ 23 ಮಂದಿ ಮೃತಪಟ್ಟಿದ್ದಾರೆ. ಮಿರ್ಜಾಪುರ ನಲ್ಲಿ 19 ಮಂದಿ, ಸಂತ ರವಿದಾಸ್ ನಗರ ಜಿಲ್ಲೆಯಲ್ಲಿ 16 ಮಂದಿ ಹಾಗೂ ಫತೇಹ್ಪುರ ನಲ್ಲಿ 11 ಮಂದಿ ಸಾವನ್ನಪ್ಪಿದ್ದಾರೆ. ರಾಯ್ ಬರೇಲಿ, ಉನ್ನಾವ್ ಮತ್ತು ಬದಾಯೂನ್ ಜಿಲ್ಲೆಗಳಲ್ಲೂ ಹೆಚ್ಚಿನ ಪ್ರಮಾಣದ ಸಾವು-ನೋವು ವರದಿಯಾಗಿದೆ.

ಭಾರತೀಯ ಹವಾಮಾನ ಇಲಾಖೆ ಮಾಹಿತಿ ಪ್ರಕಾರ, ಹಲವು ಜಿಲ್ಲೆಗಳಲ್ಲಿ ಗಾಳಿಯ ವೇಗ ಚಂಡಮಾರುತ ಮಟ್ಟ ತಲುಪಿತ್ತು. ಬರೇಲಿ ಮತ್ತು ಪ್ರಯಾಗ್‌ರಾಜ್ ಜಿಲ್ಲೆಗಳಲ್ಲಿ ಗಂಟೆಗೆ 130 ಕಿಲೋಮೀಟರ್ ವೇಗದ ಗಾಳಿ ದಾಖಲಾಗಿದ್ದು, ಇದು ಇತ್ತೀಚಿನ ವರ್ಷಗಳಲ್ಲಿ ರಾಜ್ಯದಲ್ಲಿ ದಾಖಲಾಗಿರುವ ಅತಿ ಹೆಚ್ಚು ಗಾಳಿಯ ವೇಗಗಳಲ್ಲಿ ಒಂದಾಗಿದೆ. ಚಂದೌಲಿ ಜಿಲ್ಲೆಯಲ್ಲಿ 113 ಕಿಮೀ ವೇಗದ ಗಾಳಿ ಬೀಸಿದರೆ, ಬದಾಯೂನ್‌ನಲ್ಲಿ 109 ಕಿಮೀ, ಮಿರ್ಜಾಪುರ ಮತ್ತು ರಾಂಪುರದಲ್ಲಿ 107 ಕಿಮೀ ಹಾಗೂ ಮೊರಾದಾಬಾದ್‌ನಲ್ಲಿ 102 ಕಿಮೀಗೂ ಹೆಚ್ಚು ವೇಗದ ಗಾಳಿ ದಾಖಲಾಗಿದೆ.

ಈ ಪ್ರಮಾಣದ ಗಾಳಿ ಮರಗಳನ್ನು ಕಿತ್ತೊಗೆಯಲು, ವಿದ್ಯುತ್ ಕಂಬಗಳನ್ನು ಉರುಳಿಸಲು ಹಾಗೂ ದುರ್ಬಲ ಕಟ್ಟಡಗಳನ್ನು ನೆಲಸಮಗೊಳಿಸಲು ಸಾಕಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಬಿರುಗಾಳಿಯಿಂದ ಪಶುಸಂಪತ್ತಿಗೂ ಭಾರೀ ಹಾನಿಯಾಗಿದ್ದು, ಸಂತ ರವಿದಾಸ್ ನಗರದಲ್ಲಿ 28 ಪ್ರಾಣಿಗಳು, ರಾಯ್ ಬರೇಲಿಯಲ್ಲಿ 24 ಮತ್ತು ಪ್ರಯಾಗ್‌ರಾಜ್‌ನಲ್ಲಿ 20 ಪ್ರಾಣಿಗಳು ಸಾವನ್ನಪ್ಪಿವೆ.

ಚಂದೌಲಿ ಮತ್ತು ಸೋನಭದ್ರ ಜಿಲ್ಲೆಗಳಲ್ಲಿ ಮನೆಗಳಿಗೆ ತೀವ್ರ ಹಾನಿಯಾಗಿದ್ದು, ಕ್ರಮವಾಗಿ 83 ಮತ್ತು 81 ಮನೆಗಳು ಜಖಂಗೊಂಡಿವೆ. ಮೃತರ ಕುಟುಂಬಗಳಿಗೆ ರಾಜ್ಯ ವಿಪತ್ತು ಪ್ರತಿಕ್ರಿಯೆ ನಿಧಿಯ ನಿಯಮಾನುಸಾರ ತಲಾ ₹4 ಲಕ್ಷ ಪರಿಹಾರ ನೀಡಲಾಗುವುದು ಎಂದು ಪರಿಹಾರ ಆಯುಕ್ತ ಹೃಷಿಕೇಶ್ ಭಾಸ್ಕರ್ ಯಶೋಡ್ ತಿಳಿಸಿದ್ದಾರೆ. ಮನೆ ಹಾನಿ, ಗಾಯಾಳುಗಳು ಮತ್ತು ಪಶುಸಂಪತ್ತಿನ ನಷ್ಟಕ್ಕೂ ಪರಿಶೀಲನೆಯ ಬಳಿಕ ಪರಿಹಾರ ಘೋಷಿಸಲಾಗುವುದು ಎಂದು ಹೇಳಿದ್ದಾರೆ.

IMD ಲಖನೌನ ಹಿರಿಯ ವಿಜ್ಞಾನಿ ಮೊಹಮ್ಮದ್ ದಾನಿಶ್ ಮಾಹಿತಿ ಪ್ರಕಾರ, ಬುಧವಾರ ಉತ್ತರ ಪ್ರದೇಶದಲ್ಲಿ ಬೀಸಿದ ಈ ಬಿರುಗಾಳಿ “ಥಂಡರ್ ಸ್ಕ್ವಾಲ್” ಆಗಿತ್ತು. ಸ್ಕ್ವಾಲ್ ಎಂದರೆ ಗಾಳಿಯ ವೇಗ ಅಕಸ್ಮಾತ್ ಹಾಗೂ ತೀವ್ರವಾಗಿ ಹೆಚ್ಚಾಗುವ ಅಪಾಯಕಾರಿ ಹವಾಮಾನ ಪರಿಸ್ಥಿತಿ. ಇದು ಕ್ಷಣಾರ್ಧದಲ್ಲಿ ಭೂಮಿಯ ಮೇಲಿನ ವಸ್ತುಗಳಿಗೆ ಡಿಕ್ಕಿ ಹೊಡೆದು ಭಾರೀ ಹಾನಿ ಉಂಟುಮಾಡುತ್ತದೆ ಎಂದು ಅವರು ವಿವರಿಸಿದ್ದಾರೆ.

ಪಾಕಿಸ್ತಾನದ ಮೇಲೆ ಉಂಟಾಗಿದ್ದ ವೆಸ್ಟರ್ನ್ ಡಿಸ್ಟರ್ಬನ್ಸ್, ಪಶ್ಚಿಮ ಉತ್ತರ ಪ್ರದೇಶದ ಚಂಡಮಾರುತೀಯ ವಲಯ ಹಾಗೂ ಸ್ಥಳೀಯ ಹವಾಮಾನ ಬದಲಾವಣೆಗಳು ಈ ಭೀಕರ ಬಿರುಗಾಳಿಗೆ ಕಾರಣವಾಗಿವೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಮುಂದಿನ ದಿನಗಳಲ್ಲಿ ಹೊಸ ಹವಾಮಾನ ವ್ಯವಸ್ಥೆ ಇಲ್ಲದ ಕಾರಣ ರಾಜ್ಯದಲ್ಲಿ ಬಿಸಿಗಾಳಿ ಮತ್ತು ಉಷ್ಣಾಂಶ ಮತ್ತಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಎಚ್ಚರಿಕೆ ನೀಡಲಾಗಿದೆ.

ಗುಡುಗು-ಮಿಂಚು ಹಾಗೂ ಬಿರುಗಾಳಿ ಸಮಯದಲ್ಲಿ ಮರಗಳ ಕೆಳಗೆ ಅಥವಾ ದುರ್ಬಲ ಕಟ್ಟಡಗಳ ಬಳಿ ಆಶ್ರಯ ಪಡೆಯಬೇಡಿ. ಹವಾಮಾನ ಇಲಾಖೆಯ ಎಚ್ಚರಿಕೆಗಳನ್ನು ಗಂಭೀರವಾಗಿ ಪಾಲಿಸಿ, ಅಗತ್ಯವಿದ್ದರೆ ಸುರಕ್ಷಿತ ಸ್ಥಳಗಳಿಗೆ ತೆರಳಿರಿ. ಪ್ರಕೃತಿ ವಿಕೋಪದ ಸಮಯದಲ್ಲಿ ಎಚ್ಚರಿಕೆಯಿಂದಿರುವುದೇ ಜೀವ ರಕ್ಷಿಸುವ ಮೊದಲ ಹೆಜ್ಜೆ.