ಮಂಗಳೂರಿನಲ್ಲಿ ಆಟೋ ದರ ಪರಿಷ್ಕರಣೆ ; ಕನಿಷ್ಠ ದರ 40 ರೂ.ಗೆ ಏರಿಕೆ, ಜಿಲ್ಲಾಧಿಕಾರಿ ಆದೇಶ

31-08-26 05:09 pm HK News Staffer ಕರಾವಳಿ

ಮಂಗಳೂರಿನಲ್ಲಿ ಆಟೋ ದರವನ್ನು ಕನಿಷ್ಠ ಒಂದೂವರೆ ಕಿಮೀಗೆ ರು.40ಕ್ಕೆ ಹೆಚ್ಚಿಸಲಾಗಿದೆ. ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ನಡೆದ ಜಿಲ್ಲಾ ಸಾರಿಗೆ ಪ್ರಾಧಿಕಾರದ ಸಭೆಯಲ್ಲಿ ಈ ನಿರ್ಧಾರಕ್ಕೆ ಬರಲಾಗಿದೆ.

ಮಂಗಳೂರು, ಆ.31: ಮಂಗಳೂರಿನಲ್ಲಿ ಆಟೋ ದರವನ್ನು ಕನಿಷ್ಠ ಒಂದೂವರೆ ಕಿಮೀಗೆ ರು.40ಕ್ಕೆ ಹೆಚ್ಚಿಸಲಾಗಿದೆ. ಜಿಲ್ಲಾಧಿಕಾರಿ ನೇತೃತ್ವದಲ್ಲಿ ನಡೆದ ಜಿಲ್ಲಾ ಸಾರಿಗೆ ಪ್ರಾಧಿಕಾರದ ಸಭೆಯಲ್ಲಿ ಈ ನಿರ್ಧಾರಕ್ಕೆ ಬರಲಾಗಿದೆ.

ಈ ಹಿಂದೆ ಕನಿಷ್ಠ ದರ 35 ರೂ. ಇತ್ತು. ತೈಲ ದರ ಏರಿಕೆಯಾದರೂ ಕಳೆದ ನಾಲ್ಕು ವರ್ಷಗಳಿಂದ ಮಂಗಳೂರಿನಲ್ಲಿ ಆಟೋ ದರ ಏರಿಕೆಯಾಗಿಲ್ಲ. ಇದರಿಂದಾಗಿ ಆಟೋ ಚಾಲಕರು ನಷ್ಟ ಅನುಭವಿಸುತ್ತಿದ್ದು ದರ ಏರಿಕೆ ಆಗಲೇಬೇಕು‌ ಎಂದು ಆಟೋ ಚಾಲಕರ ಸಂಘದ ವತಿಯಿಂದ ಒತ್ತಾಯ ಮಾಡಲಾಗಿತ್ತು.

ಸಭೆಯಲ್ಲಿ ಹಲವು ಜನಪರ ಹೋರಾಟಗಾರರು ತಮ್ಮ ಅಭಿಪ್ರಾಯ ಹೇಳಿದ್ದರು. ಕೊನೆಗೆ, ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಆಟೋ ದರ ಪರಿಷ್ಕರಣೆಯ ಪರವಾಗಿ ನಿರ್ಧಾರಕ್ಕೆ ಬಂದಿದ್ದು ಈಗ ಅಧಿಕೃತವಾಗಿ ಆದೇಶ ಹೊರಡಿಸಿದ್ದಾರೆ. ಗರಿಷ್ಠ ಮೂರು ಜನ ಪ್ರಯಾಣಿಕರಿಗೆ ಒಂದೂವರೆ ಕಿಮೀ ಪ್ರಯಾಣಕ್ಕೆ 40 ರೂ.ಗೆ ಏರಿಸಲಾಗಿದೆ. ಅಲ್ಲದೆ, ಆನಂತರ ಪ್ರತಿ ಕಿಮೀ ದೂರಕ್ಕೆ ಹೆಚ್ಚುವರಿ 20 ರೂ. ದರ ಪಡೆಯಲು ಅನುಮತಿಸಲಾಗಿದೆ. ಕಾಯುವಿಕೆಗೆ ಮೊದಲ ಹತ್ತು ನಿಮಿಷ ಉಚಿತವಾಗಿದ್ದು ನಂತರದ 15 ನಿಮಿಷದ ವರೆಗೆ ಅಥವಾ ಹೆಚ್ಚುವರಿ ಅವಧಿಗೆ ಐದು ರೂ.ನಂತೆ ಶುಲ್ಕ ಭರಿಸಲು ಅವಕಾಶ ನೀಡಲಾಗಿದೆ. ರಾತ್ರಿ ವೇಳೆಯಲ್ಲಿ ಹತ್ತು ಗಂಟೆಯಿಂದ ಬೆಳಗ್ಗೆ 5 ಗಂಟೆ ವರೆಗಿನ ಅವಧಿಯಲ್ಲಿ ಮಾತ್ರ ನಿಗದಿತ ದರದ ಒಂದೂವರೆ ಪಟ್ಟು ಪಡೆಯಬಹುದು ಎಂದು ಆದೇಶದಲ್ಲಿ ತಿಳಿಸಲಾಗಿದೆ.