ಸಾಧಾರಣವಾಗಿ ಚಳಿಗಾಲ ಹಾಗೂ ಮಳೆಗಾಲ ಒಂದೇ ಎಂದು ಹೇಳಬಹುದು. ಯಾಕೆಂದರೆ ಈ ಎರಡು ಕಾಲಗಳಲ್ಲಿ ಆರೋಗ್ಯದ ಸಮಸ್ಯೆಗಳು ಹೆಚ್ಚಾಗಿ ಜನರನ್ನು ಕಾಡುತ್ತವೆ. ಮುಖ್ಯವಾಗಿ ರೋಗ ನಿರೋಧಕ ಶಕ್ತಿಯ ಕೊರತೆ ಉಂಟಾಗಿ ಸೋಂಕುಗಳು ಹೆಚ್ಚಾಗಿ ತಗಲುವ ಸಾಧ್ಯತೆ ಇರುತ್ತದೆ. ಅದರಲ್ಲೂ ಮಳೆಗಾಲದ ಸಂದರ್ಭದಲ್ಲಿ ಅಂತೂ ಶೀತ, ನೆಗಡಿ, ಕೆಮ್ಮು ಸಮಸ್ಯೆಗಳು ಎದುರಾಗುವುದು ಮಾಮೂಲು.

ಹಾಗಂತ ಇಂತಹ ಸಮಸ್ಯೆಗಳು ಶುರುವಾದ ಕೂಡಲೇ ಆರಂಭದಲ್ಲಿ ನಿಯಂತ್ರಣ ಮಾಡಿ ಕೊಳ್ಳದೆ, ಬರೀ ಶೀತ ಹಾಗೂ ಕೆಮ್ಮಿನ ಸಮಸ್ಯೆ ಅಲ್ವಾ ಎಂದು ನಿರ್ಲಕ್ಷ್ಯ ಮಾಡುತ್ತಾ ಹೋದರೆ, ಕೊನೆಗೆ ಎದೆಯಲ್ಲಿ ಹಾಗೂ ಗಂಟಲಿನ ಭಾಗದಲ್ಲಿ ಕಫದ ಸಮಸ್ಯೆ ಉಂಟಾಗಿ, ಅದು ಕೊನೆಗೆ ಶ್ವಾಸಕೋಶದ ಸಮಸ್ಯೆಯವರೆಗೂ ಹೋಗುತ್ತದೆ, ಕೊನೆಗೆ ಉಸಿರಾಟ ವ್ಯವಸ್ಥೆಯಲ್ಲಿ ತೀವ್ರ ತೊಂದರೆಗಳು ಉಂಟಾಗಿ, ಆಮೇಲೆ ವಿಧಿಯಿಲ್ಲದೆ, ಆಸ್ಪತ್ರೆಯ ಬೆಡ್ ಮೇಲೆ ಮಲಗಬೇಕಾದ ಪರಿಸ್ಥಿತಿ ಎದುರಾಗುವ ಆಪತ್ತು ಹೆಚ್ಚಿರುತ್ತದೆ! ಇಂತಹ ಪರಿಸ್ಥಿತಿ ಬರಬಾರದೆಂದರೆ, ತಕ್ಷಣವೇ ಇಂತಹ ಸಮಸ್ಯೆಗಳಿಂದ ಪಾರಾಗಲು ಇಂಗು ಬಳಕೆ ಮಾಡುವುದು! ಅದು ಹೇಗೆ ಎನ್ನುವುದನ್ನು ಮುಂದೆ ಓದಿ...

ಆಯುರ್ವೇದ ಪ್ರಕಾರದಲ್ಲಿ ಇಂಗು

• ಅಡುಗೆಯಲ್ಲಿ ಚಿಟಿಕೆಯಷ್ಟು ಇಂಗು ಬಳಸದೇ ಇದ್ದರೆ ಆಗ ಅಲ್ಲಿ ಅಡುಗೆಗೆ ರುಚಿ ಬರದು ಎನ್ನುವ ಮಾತಿದೆ. ಆದರೆ ನಿಮಗೆ ಗೊತ್ತಿರಲಿ ಇಂಗು ಬಳಸಿ ತಯಾರಿಸುವಂತಹ ಅಡುಗೆಯು ರುಚಿ ಮಾತ್ರವಲ್ಲದೆ, ಹಲವಾರು ಬಗೆಯ ಆರೋಗ್ಯ ಲಾಭಗಳನ್ನು ಕೂಡ ನೀಡುವುದು.
• ಇನ್ನು ಆಯುರ್ವೇದ ಕಾಲದಿಂದಲೂ ಅಷ್ಟೇ ಹಲವಾರು ಸಮಸ್ಯೆಗಳ ವಿರುದ್ಧ ಹೋರಾಡುವ ಇಂಗಿಗೆ ವಿಶೇಷ ಸ್ಥಾನವನ್ನು ನೀಡಲಾಗಿದೆ. ವಿಶೇಷವಾಗಿ ಉಸಿರಾಟ ವ್ಯವಸ್ಥೆಯನ್ನು ಅಚ್ಚುಕಟ್ಟಾಗಿ ಕಾಪಾಡುವಲ್ಲಿ, ಹೊಟ್ಟೆಗೆ ಸಂಬಂಧಪಟ್ಟ ಸಮಸ್ಯೆಗಳಾದ  ಗ್ಯಾಸ್ಟ್ರಿಕ್, ಹೊಟ್ಟೆ ಉಬ್ಬರದಂತಹ ಸಮಸ್ಯೆಗಳನ್ನು ದೂರ ಮಾಡುವಲ್ಲಿ, ಜೀರ್ಣಶಕ್ತಿಯನ್ನು ಹೆಚ್ಚಿಸಿ, ಮಲಬದ್ಧತೆಯಂತಹ ಸಮಸ್ಯೆಗಳನ್ನು ದೂರ ಮಾಡುವಲ್ಲಿ ಇದರ ಪಾತ್ರ ಬಹಳ ದೊಡ್ಡದಾಗಿರುತ್ತದೆ.

ಉಸಿರಾಟ ವ್ಯವಸ್ಥೆ ಸಂಬಂಧಿಸಿದ ಸಮಸ್ಯೆಗಳನ್ನು ಹೋಗಲಾಡಿಸಲು

• ಒಂದು ವೇಳೆ, ಶೀತ ಕೆಮ್ಮಿನಿಂದ, ಎದೆಯಲ್ಲಿ ಕಫ ಗಟ್ಟಿಯಾಗಿ ಉಸಿರಾಟ ವ್ಯವಸ್ಥೆಗೆ ಸಂಬಂಧ ಪಟ್ಟಂತೆ ಯಾವುದಾದರೂ ಸೋಂಕುಗಳು ಎದುರಾದರೆ ಇಂಗು ಅದಕ್ಕೆ ಒಂದು ಅತ್ಯುತ್ತಮ ಪರಿಹಾರ ಎಂದು ಹೇಳಬಹುದು.
• ವಿಶೇಷವಾಗಿ ಇದರಲ್ಲಿರುವ ಆರೋಗ್ಯಕಾರಿ ಗುಣಲಕ್ಷಣಗಳು ಏನೆಂದರೆ, ಎದೆಯ ಭಾಗದಿಂದ ಕಫ ಸಮಸ್ಯೆಯನ್ನು ದೂರ ಮಾಡಿ ಎದೆಯಲ್ಲಿ ಉಂಟಾಗುವ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಇನ್ನೂ ಮುಖ್ಯವಾಗಿ ಇದರಲ್ಲಿ ಆಂಟಿ ಇನ್ಫಾಮೇಟರಿ ಗುಣಲಕ್ಷಣಗಳು ಹೆಚ್ಚಾಗಿದ್ದು, ಆಂಟಿ ಬಯೋಟಿಕ್ ಸ್ವಭಾವವನ್ನು ಸಹ ಹೊಂದಿದೆ. ಇದರಿಂದ  ಒಣಕೆಮ್ಮು, ಎದೆಯಲ್ಲಿ ಕಫ ಗಟ್ಟಿಯಾಗುವುದನ್ನೆಲ್ಲಾ ದೂರ ಮಾಡುತ್ತದೆ.

ಒಂದು ವೇಳೆ ಅತಿಯಾದ ಕೆಮ್ಮು-ಕಫ ಇದ್ದರೆ, ಈ ರೀತಿ ಮಾಡಿ

• ಒಂದು ಸಣ್ಣ ಬೌಲ್‌ನಲ್ಲಿ ಸುಮಾರು ಅರ್ಧ ಟೀಚಮಚ ಆಗುವಷ್ಟು ಇಂಗು ಪುಡಿಯನ್ನು ಹಾಕಿ ಕೊಂಡು, ಇದಕ್ಕೆ ಇಷ್ಟೇ ಪ್ರಮಾಣದಲ್ಲಿ ಅರ್ಧ ಟೀ ಚಮಚ ಆಗುವಷ್ಟು ಒಣ ಶುಂಠಿ ಪುಡಿ ಯನ್ನು ಮಿಶ್ರಣ ಮಾಡಿಕೊಳ್ಳಿ. ಆಮೇಲೆ ಇದಕ್ಕೆ ಎರಡು ಟೇಬಲ್ ಚಮಚ ಆಗುವಷ್ಟು ಗಟ್ಟಿ ಯಾದ ಉಂಡೆ ಮಾಡಿ, ಒಂದು ಟೈಟ್ ಕಂಟೇನರ್‌ನಲ್ಲಿ ಶೇಖರಿಸಿಟ್ಟುಕೊಳ್ಳಿ
• ಒಂದು ವೇಳೆ ಕೆಮ್ಮಿನ ಸಮಸ್ಯೆ ಜಾಸ್ತಿ ಇದ್ದಾಗ, ಈ ಉಂಡೆಯನ್ನು ಬಾಯಿಯಲ್ಲಿ ಹಾಕಿಕೊಂಡು ಇದರ ರಸವನ್ನು ನುಂಗುತ್ತಾ ಬನ್ನಿ. ಇದರಿಂದ ಎದೆಯ ಭಾಗ ಹಾಗೂ ಗಂಟಲಿನ ಭಾಗದಲ್ಲಿ ಕಟ್ಟಿಕೊಂಡಿರುವ ಕಫದ ಸಮಸ್ಯೆ ನಿಧಾನಕ್ಕೆ ಕರಗಿ, ಕೆಮ್ಮಿನ ಸಮಸ್ಯೆ ದೂರವಾಗುತ್ತದೆ. ದಿನದಲ್ಲಿ ಕನಿಷ್ಠ ಪಕ್ಷ ಎರಡರಿಂದ-ಮೂರು ಬಾರಿಯಾದರೂ ಕೂಡ ಈ ರೀತಿ ಮಾಡುವುದ ರಿಂದ ನಿರಂತರವಾದ ಕೆಮ್ಮಿನ ಸಮಸ್ಯೆಗೆ ಪರಿಹಾರವನ್ನು ಕಂಡುಕೊಳ್ಳಬಹುದು.

ಒಣ ಕೆಮ್ಮಿನ ಸಮಸ್ಯೆಗೆ ಪರಿಹಾರ

• ಒಂದು ವೇಳೆ ಒಣಕೆಮ್ಮು ಸಮಸ್ಯ ಜಾಸ್ತಿಯಾಗಿದ್ದರೆ, ಹೀಗಾಗಲೇ ಹೇಳಿದ ಹಾಗೆ, ಒಂದು ಬೌಲ್ ನಲ್ಲಿ ಅರ್ಧ ಟೀ ಚಮಚ ಇಂಗು ಪುಡಿ, ಅರ್ಧ ಟೀ ಚಮಚ ಶುಂಠಿ ರಸ ಹಾಗೂ ಒಂದು ಟೇಬಲ್ ಚಮಚ ಜೇನುತುಪ್ಪವನ್ನು ಮಿಶ್ರಣಮಾಡಿ ದಪ್ಪಗೆ ಪೇಸ್ಟ್ ರೀತಿ ಮಾಡಿಕೊಳ್ಳಿ
• ಆಮೇಲೆ ಈ ಮದ್ದನ್ನು ಪ್ರತಿದಿನ ಎರಡು ಬಾರಿ ಒಂದೊಂದು ಚಮಚ ಸೇವನೆ ಮಾಡುವುದರಿಂದ ಒಣ ಕೆಮ್ಮಿನ ಸಮಸ್ಯೆ ಕೂಡಲೇಕಡಿಮೆ ಆಗುತ್ತದೆ ನೋಡಿ...

ಶೀತದ ಸಮಸ್ಯೆ ಇದ್ದರೆ

• ಒಂದು ಪಾತ್ರೆಯಲ್ಲಿ ಕುದಿಯುವ ಬಿಸಿ ನೀರಿಗೆ ಕೇವಲ ಎರಡು ಹನಿ ಇಂಗು ಎಣ್ಣೆಯನ್ನು ಹಾಕಿ ಕೊಂಡು ಅದರ ಆವಿಯನ್ನು ದಿನದಲ್ಲಿ ಎರಡು ಬಾರಿಯಾದರೂ ತೆಗೆದುಕೊಳ್ಳುತ್ತಾ ಬಂದರೆ, ಮೂಗು ಕಟ್ಟುವಿಕೆ ಸಮಸ್ಯೆ ಬಹಳ ಬೇಗನೇ ಕಡಿಮೆ ಆಗಿ ಬಿಡುತ್ತದೆ.
• ಇಲ್ಲಾಂದ್ರೆ ಸ್ವಲ್ಪ ಈ ಇಂಗಿನ ಎಣ್ಣೆಯನ್ನು ಕುತ್ತಿಗೆಯ ಭಾಗ, ಎದೆಯ ಭಾಗ ಹಾಗೂ ಬೆನ್ನಿನ ಭಾಗ ದಲ್ಲಿ ಚೆನ್ನಾಗಿ ಉಜ್ಜಿ ಮಸಾಜ್ ಮಾಡುವುದರಿಂದ ಕೂಡ ಶೀತದಿಂದಾಗಿ ಮೂಗು ಕಟ್ಟುವಿಕೆ ಸಮಸ್ಯೆ ಕೂಡ ನಿವಾರಣೆಯಾಗುತ್ತದೆ.

• Join our WhatsApp group
• Follow us on Facebook 
• Follow us on Twitter

Try Hing Or Asafoetida To Get Rid From Cough And Cold Naturally During Rainy Season.